MON, 29 OCT 2001 14:34:58 GMT

PASQYRA E SHTYPIT (05.10. – 12.10.2001.)

SHTYPI NË BEOGRAD

• DANAS, 06-07.10.2001. : BIXHOZXHINJTË ME ATU TË GABUARA
• POLITIKA, 07.10.2001. : NUK DO TË BËHEMI OAZË PËR KRIMINELËT
• NEDELJNI TELEGRAF, 10.10.2001. : KA PATUR TEPËR SHUMË PËRPJEKJE PËR PËRGATITJEN E SULMIT DHE ATENTATIT MBI PRESIDENTIN GJUKANOVIQ

SHTYPI NË TIRANË

• SHEKULLI, 07.10.2001. : PARALELIZMA DIPLOMATIKE
• SHEKULLI, 07.10.2001. : KUR NATO BOMBARDONTE NË EMËR TË MUSLIMANËVE

SHTYPI NË ZAGREB

• NACIONAL, 09.10.2001. : BE KA KËRKUAR NGA VATIKANI QË T’I NDALOJË DJATHTISTËT E KAPITOLIT
• GLOBUS, 12.10.2001. : RAPORTI I SIS PËR GJENERALIN STIPETIQ: OFICERI KROAT NË RRJETIN E SPIUNËVE SERBË?
• JUTARNJI LIST, 13.10.2001. : ANTO KOVAÇEVIQ VESNA PUSIQIT: ZOTI JU KA KRIJUAR PËR SHTRAT, E JO PËR TË URTË

SHTYPI NË PRISHTINË

• KOHA DITORE, 09.10.2001. : ISLAMI TALEBANEZ ËSHTË SERBIZMI SIÇ E SHIHTE MILLOSHEVIQI
• ZËRI, 12.10.2001. : TË VARFËRIT: SHUMICA DËRMUESE E ELEKTORATIT TË KOSOVËS

SHTYPI NË BANJALLUKË

• NEZAVISNE NOVINE, 09.10.2001. : PENGESA NË LIDHJE
• NEZAVISNE NOVINE, 11.10.2001. : VITET E VARFËRISË
• NEZAVISNE NOVINE, 12.10.2001. : PENGJET E ALISË DHE HARISIT
• NEZAVISNE NOVINE, 13-14.10.2001. : EKONOMIA MBI POLITIKËN

SHTYPI NË BEOGRAD

DANAS, 06-07.10.2001.

Në margjinat e shënimit të përvjetorit të parë të “revolucionit të kadifenjtë” ser të tetorit

BIXHOZXHINJTË ME ATU TË GABUARA

(...) Koshtunica jeton (dhe vepron) me bindjen se me fitoren mbi Millosheviqin të 24 shtatorit të vitit të kaluar ka hequr nga vetvetja shenjën e “zgjidhjes së përkohshme” dhe në “marshin legalist” këmbëngulës të tij drejt institucioneve dhe rivalëve po përpiqet që ta promovojë veten si një president të fortë (kategori, kjo, jokushtetuese).

Gjingjiqit, në anën tjetër, nuk i bie ndërmend të lejojë që “dikush që rri atje lart duarkryq dhe jep shuplaka majtas e djathtas” t’ia rrezikojë pozitën dominante në Serbi. I pari e imponon konceptin e nacionalizmit konservativ dhe ksenofobisë së kontrolluar (nën vellon e demokracisë dhe legalizmit), i dyti, ndërkaq, ekonominë liberale të vrazhdë, e cila në rrethanat serbe më parë i ngjan ripërtëritjes së tutorisë dhe monopolit të politikës dhe shtetit se përgatitjes së terrenit për një divorc sistematik me disa koncepte të mëparshme socio-ekonomike të ngjashme, por ndryshe të formësuar ideologjikisht. Të dytë – në atë testim reciprok të qëndrueshmërisë – mbështeten përsëri te mekanizmat dhe modelet e pushtetit të Millosheviqit, të potencialeve të tij kadrovike, pa marrë parasysh që përpiqen me çdo kusht që këtë ta mohojnë.

Më e keqja që mund t’i ndodhë Serbisë – si epilog i rivaliteteve dhe konflikteve “të dy deshëve mbi trarin e ngushtë” – nuk janë zgjedhjet e mundshme në fund të këtij ose në fillim të vitit të ardhshëm për shkak të shpërërjes së (pa)kontrolluar të DOS-it. Partia në pushtet, sidoqoftë, po mbijeton mi një konsensus tepër të brishtë. Shikuar në planin afatgjatë, më alarmante do të ishte nëse Koshtunica dhe Gjingjiqi “në intteres të popullit dhe shtetit” të arrijnë një kompromis që do të përpiqej t’i pajtonte këto dy koncepte – të ekonomisë liberale parashtetërore dhe nacionalizmit konservativ, të krijojnë një “gemisht”, sado qëkjo të duket e panatyrshme. Një marrëveshje e tillë – pse të mos thuhet – makiaveliste do t’ua mundësonte të bëjnë çfarë të duan në “terrenin e tyre”, serbia do të sorollatej midis modernes dhe anakronikes, populli do të zhytej në një agoni edhe më të thellë ekonomike dhe sociale. Me këtë do të krijoheshin të gjitha presupozimet që një absolutizëm i Millosheviqit të klonohet në më shumë varianta, me tipare ideologjike të ndryshme, me një qëllim të vetëm që me çdo kusht të ruhet pushteti. (...)

Ivan TOROV

--- up ---

POLITIKA, 07.10.2001.

Goran Vesiq, këshilltar i ministrit federal të punëve të brendshme

NUK DO TË BËHEMI OAZË PËR KRIMINELËT

Kemi më pak policë nga ç’na duhen, ndërsa ish-pushteti ndante para për policinë si t’i ketë pasur njëqind mijë, që me tepricën e parave t’i financonte vilat e gjeneralëve dhe klubin “Milicionar”

(...) *Flitej që policia jonë është si një armatë, sa ajo vërtet ka njerëz?

-Gjendja numerike në polici ishte një befasi e madhe. Pushteti i vjetër nuk e shpallte numrin, prandaj në bazë të parave që janë ndarë u përpoqëm të përcaktojmë se sa policë në të vërtetë ka. Janë ndarë shumë para jo vetëm nga buxheti, por edhe nga fonde të zeza, prandaj kemi konkluduar që MPB numëron gati njëqind mijë njerëz. Tani kemi kuptuar se policë ka 40 deri në 50 mijë, ndërsa gjithsejt 20 mijë janë në uniformë. Na dukej tepër e pabesueshme që ne sot të kemi më pak policë për kokë banori se Kroacia, Rumania ose Bullgaria. Flas, në të vërtetë, për policinë republikane, sepse ajo federale ka një numër të vogël policësh, nuk e llogaris Malin e Zi. Ku, pra, kanë shkuar paratë? Një pjesë ka shkuar për pajisjen e njësive që kishin për detyrë t’i thyenin demonstratat, ndërsa pjesa më e madhe për vilat e gjeneralëve dhe klubin futbollist “Milicionar”...

*Keni thënë që relativisht shpejt do t’i ndërpreni kanalet e mafias në këtë vend.

-Sa i përket naftës, me krenari mund të them se janë ndërprerë kanalet e kontrabandës së naftës ku kanë marrë pjesë shumë njerëz, disa nga ata janë financues të partive të veçanta dhe ata tani qëndrojnë pas kësaj përndjekjeje kundër rregullores së qeverisë për naftën. Më shumë se 70 për qind e cigareve në tregun tonë kanë qenë të kontrabanduara, ndërsa tani kjo përqindje ka rënë nën 30 për qind. Luftimi i drogës kërkon shumë kohë... Kemi indicje se ish-kreu shtetëror ka qenë i përzier në kontrabandën e drogës, sepse si të shpjegohet ndryshe një sasi e tillë droge në trezorin e sigurimit shtetëror... Tregtia me njerëz shkon nëpër kanale të ndryshme, aty merr pjesë mafia nga vende të ndryshme dhe me hyrjen në Interpol besoj se do të jemi më të suksesshëm. (...)

Maja VUÇETIQ

--- up ---

NEDELJNI TELEGRAF, 10.10.2001.

Intervistë: Vukashin Marash, malaziasi më misterioz, këshilltar për siguri kombëtare i Millo Gjukanoviqit

KA PATUR TEPËR SHUMË PËRPJEKJE PËR PËRGATITJEN E SULMIT DHE ATENTATIT MBI PRESIDENTIN GJUKANOVIQ

(...) *Ka njerëz në Beograd që mendojnë se afera “Subotiq” është krijesë e shërbimeve të huaja informative?

-Nuk e kam zakon që ta akuzoj në mënyrë të përgjithësuar për këtë ndonjë shërbim sekret para se gjërat t’i hulumtojmë në detaje, po jemi në rrugën më të mirë që këtë ta vërtetojmë më në fund. Kam jo vetëm një përshtypje të fuqishme, por edhe fakte të caktuara – të cilat do t’i shpallim publikisht së shpejti – se “Nacional” thjesht dëshiron ta arrijë ndonjë qëllim që nuk është vetëm i tij, por edhe qëllim i atij dhe i atyre që udhëheqin me këtë përndjekje dhe të cilët, bashkë me “Nacional”-in, si instrumentin e tyre, dëshirojnë të realizojnë interesa materiale, e besa edhe politike, sepse ato janë të lidhura mes vetes... Mos u befasoni nëse nga kjo aferë të konceptuar si mefistofeliane të mos dalë një aferë tjetër e re dhe e madhe, por kësaj here mu në zonën e mediave, gazetarëve dhe urdhërdhënësve të tyre. Ekzistojnë indicje të prekshme të cilat e paralajmërojnë aferën dhe shthurjen e një lloji të tillë. Së shpejti mund të pritet davaritja e mjegullës nga kulla e rrenave të “Nacional”-it, pas së cilës do të shihen në formë lakuriqe të gjithë protagonistët e kësaj pune të ndyrë në Kroaci, Mal të Zi dhe Serbi. (...)

Marko LLOPUSHINA

--- up ---

SHTYPI NË TIRANË

SHEKULLI, 07.10.2001.

PARALELIZMA DIPLOMATIKE

Historia e diplomacisë shqiptare deri më sot nuk njeh precedentë të tjerë të ngjashëm me vizitën e Ministrit të Mbrotjes maqedon, Vlado Buçkovski, për këtë arsye nuk është kurrë e tepërt të vazhdohet të komentohet kjo vizitë. Asnjeherë më parë nuk ka ndodhur që një personalitet i lartë i një vendi të huaj, e për më tepër fqinj, të ketë përdorur tone dhe fraza kaq të rënda ndaj Shqipërisë edhe në kohën e Luftës së Ftohtë.

Çfarë fshihet pas akuzave mbi ekzistencën e kampeve terroriste në Shqipëri? Fakti që Buçkovski përdor si burim të vetëm mediat maqedonase, është një tregues shumë domethënës se edhe vetë Buçkovski nuk i beson një teze të tillë. Përndryshe do të besonin që ai është tepër naiv, gjë që eksperienca e punës së tij na e hedh poshtë. Buçkovski nuk e beson edhe vetë ato çfarë thotë, ndaj edhe si burim nuk përdor asnjë institucion shtetëror maqedonas, por vetëm shtypin, i cili në këtë rast përbën alibinë më të mirë për të. Pra, kur nesër të zyrtarizohet se akuzat e tij nuk qëndrojnë, ai mund të justifikohet shumë lehtë me mediat maqedonase, pa vënë para përgjegjësisë asnjë institucion të FYROM-it.

Por kjo përbën vetëm një anë të problemit. Çështja tjetër është se ku e gjeti kurajon diplomatike që t'i bëjë këto akuza, jo nëpërmjet një deklarate zyrtare të ministrisë së tij, me një notë proteste qeveritare, por duke e thënë me fjalët e Sabri Godos, "në mes të shtëpisë sonë".

Buçkovski jo se nuk është një politikan apo diplomat që nuk i di rregullat mirë, por në rastin e Shqipërisë ai ka bërë dallim. Këtë të drejtë ai e gjen në nivelin e diplomacisë shqiptare, e cila ka një pozicion "të nënshtruar" në arenën ndërkombëtare. Nuk kemi kurajo të shprehim asnjë frazë sipas mendimit tonë, nuk mund të hedhim asnjë ide, sepse kemi humbur besimin tek bota, nuk kemi ditur kurrë të shprehemi për Kosovën, për statusin e saj. Po kështu edhe për Maqedoninë. Duke nguruar se nga Perëndimi apo nga Lindja mund të vinte ndonjë akuzë për Shqipërinë, nuk u shprehëm kurrë që të merren parasysh kërkesat e shqiptarëve në Maqedoni dhe të plotësohen të drejtat themelore të tyre sipas statuteve ndërkombëtare. Gjatë periudhës kur Ministri I Jashtëm ishte Paskal Milo, deklaratat zyrtare përshkoheshin nga fraza formale si "dëshirojmë paqe dhe stabilitet në Maqedoni", sikur mos të ishte fjala për një shtet fqinj ku jetojnë 600 mijë shqiptarë, në vazhdimësi territoriale me Shqipërinë, por për problemet etnike në Ruandë apo në Sri Lanka.

Arjan KONOMI

--- up ---

SHEKULLI, 07.10.2001.

KUR NATO BOMBARDONTE NË EMËR TË MUSLIMANËVE

Përshtypjet e Bin Ladenit për shtypjen dhe shfrytëzimin sistematik të myslimanëve nga SHBA janë tërësisht spekulative dhe këtë e kupton çdo njeri normal që jeton sadopak me ngjarjet e kohës. Provën e kundërt s'kemi nevojë ta kërkojmë larg. Këtu në Ballkan, NATO është detyruar të bombardojë dhe të ndërhyjë në mbrojtje të Kosovës dhe Bosnjes. Popullsia boshnjake dhe kosovare është në shumicë e besimit mysliman. Në logjikën fondamentaliste, që realisht është anti-Krisht dhe anti-Muhamet – do të thuhej se bombardimet e NATO-s në Ballkan u bënë kundër të krishterëve ortodoksë, meqënëse tiranët serbë të Beogradit dhe Paljes I përkisnin besimit ortodoks. Kjo logjikë është krejtësisht e huaj për vendet dhe njërëzit e lirë. Në rastin e Bosnjes dhe Kosovës, NATO me Shtetet e Bashkuara të Amerikës në krye janë detyruar të përdorin forcën për të shpëtuar jetën dhe lirinë e dy popujve, rrjedhimisht edhe vlerat e qytetërimit botëror. Në situatën e krijuar, NATO do ta bënte atë që bëri, edhe po të sundonin në Beograd myslimanët dhe kosovarët të ishin të krishterë. Në rastin e sulmeve kundër regjimit të talebanëve dhe shtabit të Bin Ladenit kemi një situatë tjetër: Shtetet e Bashkuara të Amerikës po i përgjigjen sulmit të terroristëve me qendër në Afganistan. Objektivi i këtyre sulmeve është i qartë:asgjesimi i trurit që lëviz rrjetin e terrorizmit ndërkombëtar; rrëzimin e një regjimi diktatorial që u ka dhënë mbrojtje dhe baza terroristëve. Suksesi i këtyre sulmeve do të thotë paqe dhe siguri në botë, liri dhe prosperitet për vetë popullin e shtypur afgan. Fetë këtu nuk hyjnë fare. Liria nuk mund t'i gjunjëzohet tiranisë, krimit.

Preç ZOGAJ

--- up ---

SHTYPI NË ZAGREB

NACIONAL, 09.10.2001.

BE KA KËRKUAR NGA VATIKANI QË T’I NDALOJË DJATHTISTËT E KAPITOLIT

Ambasadorët e Bashkimit Evropian, javën e kaluar në Zagreb, në një mbledhje të veçantë nga sekretari i Selisë së Shenjtë për marrëdhënie me shtetet, msgr. Jean-Louise Tauran, kanë kërkuar zyrtarisht nga Vatikani që t’i pengojë sulmet e upeshkvinjve kroatë mi pushtetin legjitim të zgjedhur në Kroaci dhe ta ndërpresin mbështetjen e hapur që ua japin forcave nacionaliste më radikale që dëshirojnë ta rrëzojnë me dhunë pushtetin e zgjedhur në mënyrë demokratike, ka mësuar “Nacional”-i nga urime tëë besueshme diplomatike. Mbështetja e dhënë forcave të tilla që e kanë sjellë vendin në zgrip të varfërisë dhe e kanë mbajtur në izolim ndërkombëtar, konsideron diplomacia evropiane, e ngadalëson zhvillimin e Kroacisë në një shoqëri bashkëkohore evropiane të vendeve të përparuara dhe të pasura të Perëndimit të zhvilluar. Bashkimi Evropian me këtë akt e ka mbështetur deri tani në mënyrën më të hapur presidentin kroat, Stipe Mesiqin, i cili i ka dërguar para pak kohësh në letër Atit të Shenjtë, duke kërkuar nga Vatikani që ta përdorë ndikimin e vet dhe ta ndërpresë përzierjen e ipeshkvinjve kroatë në politikën dhe ekonominë e shtetit kroat. (…)

Bruno LLOPANDIQ

--- up ---

GLOBUS, 12.10.2001.

RAPORTI I SIS PËR GJENERALIN STIPETIQ: OFICERI KROAT NË RRJETIN E SPIUNËVE SERBË?

Shërbimi i sigurisë – informacionit i ministries së mbrojtjes (SIS) nuk e ka shkelur ligjin, as që ka dale nga kornizat e kompetencave të veta me rasin e bërjes së raportit të sigurisë për gjeneralin Petar Stipetiq dhe anëtarët e tjerë të Shtabit të Përgjithshëm të Forcave të Armatosura të RK, ka konkluduar Kancelaria për Sigurinë Nacionale (UNS), meqenëse, në fund të prillit, shefi i Shtabit të Përgjithshëm e ka akuzuar drejtpërdrejt SIS-in për përcjellje dhe përgjim të paligjshëm. Siç pohon UNS, nuk është shkelur ligjjshmëria në kryerjen e detyrave, sepse atto janë të përcaktuara me nenin 150 të Ligjit për Mbrojtjen. Ajo pjesë e Ligjit të Mbrojtjes, në të vërtetë, ia jep mandatin SIS-it që të mledhë vlerësime kundërzbulimi për të gjithë përbërësit e MORH, duke përfshirë edhe pjesëtarët e Shtabit të Përgjithshëm, pra edhe vetë shefin e tij. (…) Për shembull, për gjeneralin Stipetiq pohohet se ka lidhje kumbarie me një officer të lartë të UK bashkëshortja e të cilit është e nacionalitetit serb. A është kjo vërtet nnjëë e dhënë që tërheq vërejtjen për një rrezikim të sigurisë përreth gjeneralit dhe që është dashur të shkruhet në dokumentin e SIS-it? (…) Por, veprimtarët e SIS-it në vlerësimin e tyre të këtij fakti nuk kanë shpjeguar deri në fund dhe e gjithë kjo, rastësisht ose jo, ka mbetur e pasqaruar si duhet. (…)

Igor ALBORGHETTI

--- up ---

JUTARNJI LIST, 13.10.2001.

ANTO KOVAÇEVIQ VESNA PUSIQIT: ZOTI JU KA KRIJUAR PËR SHTRAT, E JO PËR TË URTË

Në një incident seksist, Anto Kovaçeviq (HKDU) e ka sulmuar dje në Kuvend deputeten Vesna Pusiq (HNS). – Zonja Pusiq, Zoti ju ka krijuar për shtrat, e jo për të urtë, po ju dëshironi të jeni të urtë – ka thënë Kovaçeviq. E zënë në befasi nga një incident i tillë, Pusiq ka kërkuar nga kryesuesi Mate Arloviq që t’i bëjë vërejtje dhe i ka ftuar të gjithë kolegët që ta braktisin sallën e kuvendit. Edhe pse në fillimisht deputetet nga të gjitha partite e çuan në këmbë, u kthyen në banka pasi që kryesuesi Arloviq bëri ftesë që të diskutohej ky “incident i vogël”. Në vazhdim të mledhjes, Arloviqi e bëri një gaf, për të cilin kërkoi falje më vonë, duke u drejtuar me vërejtje Kovaçeviqit dhe Pusiqit, sepse e “kanë fyer njëri-tjetrin”. (…) Pas dëgjimit të sërishëm të fonogramit të diskutimit, Arloviq I ka kërkuar të falur zonjës Vesna Pusiq dhe e ka tërhequr vërejtjen drejtuar asaj, ndërsa e ka vërtetuar vërejtjen për Kovaçeviqin dhe e ka fuqizuar duke ia marrë të drejtën për të diskutuar deri në fund të asaj pike të rendit të ditës. (…)

Suzana BARILAR, Natasha BOZHIQ dhe Tina LLAKIQ

--- up ---

SHTYPI NË PRISHTINË

KOHA DITORE, 09.10.2001.

ISLAMI TALEBANEZ ËSHTË SERBIZMI SIÇ E SHIHTE MILLOSHEVIQI

1.

Më 12 shtator të këtij viti, një ditë pas sulmit terrorist të paprecedencë mbi SHBA-në, Kosova ishte vendi i vetëm ballkanik i cili në rrugë, me praninë e mija qytetaarëve nëpër sheshet e qyteteve, shprehi solidaritetin e vet me popullin amerikan. Për të gjithë ne që ishim në rrugët e Kosovës, ishte shprehje e natyrshme solidariteti me popullin, i cili në momentet vendimtare për jetën tonë u ngrit në mbrojtje duke përdorur mjete deri atëherë të paprecedencë, të bombardimit të caqeve ushtarake serbe. Por, mendoj se kjo nuk ishte vetëm shprehje falënderimi për çliruesit e Kosovës. Ma merr mendja se kishte edhe një solidaritet të shprehur me viktimat e terrorit: kosovarët kanë jetuar aq gjatë nën frikën e terrorit, të atij shtetëror serb, saqë instinkti i tyre shumë lehtë identifikohej me të gjithë ata që përcollën në një ditë të zakonshme pune të afërmit e tyre për të mos i gjetur më ndër të gjallët.

Dhe, parmbrëmë, duke përcjellë lajmet televizive rreth sulmeve amerikane dhe britanike mbi talebanët në Afganistan, nuk mund e të mos nxirreshin paralele me ditët tona të fundmarsit të vitit 1999. Sulmohej sërish një regjim totalitar, i cili kishte pjellë terrorizmin si formë të veçantë të shprehjes, por që nuk linte pa e ndrydhur tërë popullin. Talebanët e Afganistanit, të cilët në emër të ideologjisë së vet janë në gjendje të kufizojnë në formë aq drastike liritë e të gjithë qytetarëve të Afganistanit, kanë shumë afërsi me talebanët e Serbisë së Millosheviqit. Islami, siç e shohin talebanët, është serbizmi siç e shihte Millosheviqi, ideologët dhe ithtarët e tij. Në që të dyja rastet, besimi shprehet në mohim të të drejtave të tjerëve, duke përfshirë edhe të drejtën për jetë. (...)

4.

ǒmund të bëjmë ne kosovarët në këtë luftë? Së pari të eliminojmë fundamentalizmin brenda shoqërisë sonë. Dhe nuk e kam fjalën vetëm për atë pakicë absolute fundamentalistësh islamikë të cilët janë paraqitur pas luftës, me përpjekje për të ngulitur islamin si normë shoqërore. Përpjekjet e tyre, sado të bezdisshme, janë të izoluara brenda një lëvizjeje shumë më gjerë shoqërore te shqiptarët, të cilët historikisht gjithnjë e kanë pasur më të fortë ndjenjën kombëtare sesa çfarëdo tjetër, e në këtë moment historik këtë e kanë begatuar edhe me një lëvizje autoktone për demokraci. Fjala është, gjithsesi, për fundamentalizmin e manifestuar në çështje kombëtare, i cili e tregon veten edhe nëpërmjet terrorizmit ndaj minoriteteve, siç është rasti i vjemë i autousit të “Nishekspresit” në Merdarë.

Ndonëse Kosova nuk ka sot forcë të armatosur me të cikën do të mund t’i bashkohej aleancës botërore kundër terrorizmit, do të mund ta bëjë me mjetet që i ka. Dhe, pos luftës kundër shprehjeve totalitare në shoqërinë tonë, mund të ofrojmë ndihmë edhe në aspekte të tjera. Lufta do të krijojë një krizë humanitare në Afganistan e Pakistan. Pjesëtarët e TMK-së, si formacion i financuar nga OKB-ja në Kosovë, do të mund të ndihmonin që sot në përkrahjen e çfarëdo operacioni humanitar në kufirin mes Afganistanit dhe Pakistanit, e nesër, pas çliriimit të Afganistanit nga regjimi i talebanëve, do të mund të ndihmonin edhe në rindërtimin fizik dhe shoqëror atje.

Veton SURROI

--- up ---

ZËRI, 12.10.2001.

TË VARFËRIT: SHUMICA DËRMUESE E ELEKTORATIT TË KOSOVËS

62 për qind e kosovarëve janë të varfër.

Ky rezultat i një hulumtimi të Bankës Botërore u është komunikuar kosovarëve pak më shumë se një muaj para zgjedhjeve parlamentare të 17 nëntorit.

Asnjë parti politike në Kosovë nuk ka përkrahjen e 62 për qind të elektoratit.

Partitë politike, natyrisht, kundërshtojnë krimin e organizuar ekonomik, korrupsionin, varfërinë, dallimet e mëdha sociale, papunësinë dhe premtojnë një zhvillim ekonomik të Kosovës, mirëqenie sociale, zvogëlim të papunësisë. Megjithatë, të gjitha këto janë më shumë pjesë e një marketingu parazgjedhor sesa e gatishmërisë për t’u ballafaquar me realitetin e hidhur social dhe ekonomik të Kosovës.

Përndryshe, ky ballafaqim është parakusht për çfarëdo politike të re ekonomike që duhet ta nxjerrë Kosovën nga kriza latente, e cila nuk shihet shumë falë dy momenteve shumë të rëndësishme: 1. Prania e jashtëzakonshme ndërkombëtare, e cila bën që kosovarët në forma të ndryshme të përfitojnë nga kjo prani, prej punësimit të drejtpërdrejtë në institucionet dhe organizmat ndërkombëtarë, qirasë së banesave, deri te harxhimet tjera të ndërkombëtarëve; 2. Prania e madhe e kosovarëve në Perëndim, prej nga vijnë në Kosovë dhjetëra miliona marka në vit.

As njëri e as tjetri faktor nuk do të mund ta mbajnë pa kufij gjendjen e sotme sociale në Kosovë. Këtë do ta mësojnë në veçanti kuvendi dhe qeveria e Kosovës të dalë nga zgjedhjet e nëntorit.

Blerim SHALA

--- up ---

SHTYPI NË BANJALLUKË

NEZAVISNE NOVINE, 09.10.2001.

PENGESA NË LIDHJE

A janë nënshkruar lidhjet speciale për nevojat e popullit dhe qytetarëve, ose për nevojat e kabineteve presidenciale, ose për nevojat e marrëdhënieve ndërpartiake midis SDS dhe DSS të Koshtunicës? Është e qartë se në sferën e lidhjeve speciale janë gërshetuar dhe futur interesa të ndryshëm dhe se politikanët nga RS dhe Jugosllavia përpiqen që nga e gjithë kjo të nxjerrin dobi politike, ndërsa interesat e qytetarëve i vënë në plan të dytë.

Radomir NESHKOVIQ

--- up ---

NEZAVISNE NOVINE, 11.10.2001.

VITET E VARFËRISË

Në vend të – lokomotivës që do ta çojë përpara ekonominë e BH – siç flitej shpesh në dy vjetët e parë pas luftës, ekonomia e kantonit të Tuzllës tani po përshkruhet vetëm me një seri përcaktuesish negativë. Pushteti i ri, ndërkaq, nuk po e vë re se populli mezi po e mbijeton – vitin e njëmbëdhjetë dhe më të vështirin -. Përgjigjja tashmë sterile dhe – errësuese –, aq shumë e shqiptuar gjatë këtij viti, është se ndryshimet nuk mund të bëhen brenda natës.

Samir KAHROVIQ

--- up ---

NEZAVISNE NOVINE, 12.10.2001.

PENGJET E ALISË DHE HARISIT

Opinioni i BH, sipas të gjitha gjasave, do të merret gjatë me historinë nëse Alia Izetbegoviq është fotografuar ose jo bashkë me Osama bin Ladenin. Shumë më e rëndësishme nga ajo nëse është takuar a fotografuar Alia me Bin Ladenin është të sqarohen dhe kuptohen pasojat tragjike të politikës së tij dhe të Silajxhiqit ndaj vendeve islamike gjatë dhjetë vjetëve të fundit. Duke mbajtur lidhje joselektive me vendet dhe regjimet islamike, këta dy liderë politikë u kanë shkaktuar myslimanëve të BH dëm të pamasë.

Branko PERIQ

--- up ---

NEZAVISNE NOVINE, 13-14.10.2001.

EKONOMIA MBI POLITIKËN

Trupi bashkërendues ekonomik në nivel të BH që do të merret me strategjinë e zhvillimit të BH si tërësi dhe pozicionimin e saj në tregun evropian ka buruar nga domosdoshmëria ekonomike dhe është dëshmi e nevojës për veprim të përbashkët në nivel të shtetit në tërësi. Konceptet e ndara dhe të mbyllura të zhvillimit ekonomik kanë dështuar. Koncepti i ri i zhvillimit ekonomik presupozon BH si një tërësi, të integruar në tregun ballkanik dhe evropian, çka ndikon edhe në funksionimin e sistemit politik në BH.

Radomir NESHKOVIQ

F u n d

--- up ---